काठमाडौं— कारोबारको पहिलो दिन आइतबार पुँजीबजारमा उच्च अंकको गिरावट देखिएको छ । नेपाल स्टक एक्सचेञ्ज परिसूचक २० अंकले घटेर एक हजार आठ सय ८८ दशमलव ५५ अंकमा कायम भएको छ ।
आइतबार दुई सय ६० कम्पनीको ३७ लाख ८७ हजार दुई सय ४१ कित्ता शेयर ३२ हजार चार सय १४ पटक खरिद बिक्री हुँदा एक अर्ब २० करोड ७१ लाख २२ हजार छ सय रुपैयाँ बराबरको कारोबार भएको छ ।
आइतबार सबै समूहको उपसूचक रातो देखिएको छ । सबैभन्दा धेरै व्यापार समूहको उपसूचक ५४ दशमलव ९९ र निजीवन बीमा समूहको उपसूचक ४७ दशमलव २४ अंकले घटेको छ ।
बैंकिङ समूह २३ दशमलव ८९, होटल तथा पर्यटन समूह १८ दशमलव ९१, जलविद्युत् समूह ४१ दशमलव ६८, लगानी समूह शून्य दशमलव ७४ र जीवन बीमा समूह ३६ दशमलव ७४ अंकले घटेको छ ।
त्यस्तै उत्पादन तथा प्रशोधन समूह ३५ दशमलव ७२, लघुवित्त समूह ३५ दशमलव ८४, म्युचुअल फन्ड शून्य दशमलव ०२ र अन्य समूह १० दशमलव ९७ अंकले घटेको छ ।
आइतबार कालिञ्चोक दर्शन लिमिटेडको शेयर मूल्य सबैभन्दा धेरै नौ दशमलव ९६ प्रतिशतले बढेको छ । स्वाभिमान लघुवित्त वित्तीय संस्था लिमिटेडको शेयर मूल्य सबैभन्दा धेरै नौ दशमलव ६१ अंकले घटेको छ ।
कारोबार रकमका आधारमा आइतबार सबैभन्दा धेरै एनआइसी एसिया बैंक लिमिटेडको पाँच करोड पाँच लाख ६२ हजार रुपैयाँ बराबरको शेयर खरिद बिक्री भएको छ ।
कारोबार भएका शेयर संख्याका आधारमा भने सबैभन्दा धेरै कुमारी बैंक लिमिटेड प्रमोटर शेयर एक लाख ७४ हजार छ सय १० कित्ता किनबेच भएको छ ।
