काठमाडौं— वरिष्ठ उपाध्यक्षका तीन उमेदवारले जितका लागि आवश्यक मत प्राप्त गर्न नसकेपछि नेपाल उद्योग वाणिज्य महासंघको चुनाव दोस्रो चरणमा प्रवेश गरेको छ । दोस्रो चरणको चुनावका लागि वरिष्ठ उपाध्यक्षका प्रत्यासीमध्ये एक रामचन्द्र संघई बाहिरिएका छन् ।
बुधबार भएको चुनावको मतपरिणामअनुसार वरिष्ठ उपाध्यक्षका प्रत्यासीमध्ये अन्जन श्रेष्ठले ३८ प्रतिशत, उमेशलाल श्रेष्ठले ३१.५१ प्रतिशत र रामचन्द्र संघईले ३०.४६ प्रतिशत मत प्राप्त गरेको निर्वाचन कमिटीले जानकारी दिएको छ । नेपाल उद्योग वाणिज्य संघको विधानअनुसार निर्वाचित हुन वरिष्ठ उपाध्यक्ष उम्मेदवारले कुल मतमध्ये न्यूनतम ५१ प्रतिशत मत प्राप्त गर्नुपर्छ ।
अब अन्जन र उमेशबीच बिहीबार दिउँसो २ देखि ५ बजेसम्म निर्वाचन हुने मुख्य निर्वाचन अधिकृत लिलामणि पौडेलले जानकारी दिए ।
विधानअनुसार महासंघमा वरिष्ठ उपाध्यक्ष निर्वाचित हुने व्यक्ति नै अर्कोपटक स्वतः अध्यक्ष हुने प्रावधान छ । सोही प्रावधानअनुसार यो कार्यकालका लागि अघिल्लोपटक वरिष्ठ उपाध्यक्षमा निर्वाचित भएका चन्द्र ढकाल महासंघको अध्यक्ष हुनेछन् ।
साथै जिल्ला नगर उपाध्यक्षमा सुरकृष्ण वैद्य निर्वाचित भएका छन् भने एसोसियट उपाध्क्षमा ज्योत्सना सुब्बा श्रेष्ठ र वस्तुगत उपाध्यक्षमा हेमराज ढकाल निर्वाचित भएका छन् ।
