काठमाडौं– भजन शिरोमणि, वरिष्ठ गायक तथा संगीतकार भक्तराज आचार्यको पार्थिव शरीरलाई अन्तिम श्रद्धाञ्जलीका लागि आज सङ्गीत तथा नाट्य प्रज्ञा प्रतिष्ठानको परिसरमा राखिने भएको छ।
आचार्यको पार्थिव शरीर बिहान ९ बजेपछि प्रतिस्ठानमा राखिने छ। अन्तिम श्रद्धाञ्जली दिन प्रतिष्ठानमा गीतसङ्गीत क्षेत्रका हस्ती तथा कलाकारसहितको उपस्थिति हुनेछ।
पिता बलभद्र र मात रेनुकाको कोखबाट जन्मिएका भजन शिरोमणीको रुपमा प्रसिद्ध ८२ वर्षीय संगीतकार आचार्य १६ वर्ष मात्रै साङ्गीतिक जीवनमा सक्रिय रहे।
आचार्यको श्रीमती, दुई छोरा–बुहारी र दुई नाति छन् । उनका दुई छोराहरु सत्यराज र स्वरुपराज पनि संगीत साधनामा सत्रिय छन् ।
१६ वर्ष मात्रै साङ्गीतिक जीवनमा सक्रिय रहेका आचार्यले झण्डै साढे चार सय गीत रेकर्ड गराएका छन् ।
आचार्यको स्वरमा गुन्जिएका मुटु जलिरहेछ, जति चोट दिन्छौ, जहाँ छन् बुद्धका आँखा, हजार सपनाहरूको माया, हजार आँखा हेर्ने, कोही नगरोस् प्रेमलगायतका गीत चर्चित छन् । त्यसैगरी लोकप्रिय भजनहरुमा एक दिन मैले प्रभूसँग, राम यहीँ छन्, भगवान जीवन नाउ, दुर्गे देउ भक्ति मलाई, तन मन वचनले जस्ता छन् ।
भजनशिरोमणिको उपाधि पाएका आचार्य सन् १९७३ देखि ८६ सम्म संगीत साधनामा सक्रिय थिए। भक्तराज सूर सम्राट मानिन्छन्।
आचार्यले भजनदेखि आधुनिक गीत, गजल बालगीतलगायतमा स्वर र संगीत दिएका छन्।
२०४९ सालमा जिब्रोमा क्यान्सर भएपछि आचार्यको जिब्रो काट्नुपरेको थियो । त्यसपछि उनले गाउन र राम्रोसँग बोल्न सकेका थिएनन्।
