काठमाडौं— कृषि तथा पशुपंक्षी विकासमन्त्री डा.वेदुराम भुसालले कृषि क्षेत्रलाई प्रधानमन्त्री र अर्थमन्त्रीले चासो नदिएको बताएका छन् ।

आइतबार काठमाडौंमा पेशागत महासंघ नेपालले आयोजना गरेको कार्यक्रमलाई सम्बोधन गर्दै मन्त्री डा.भुसालले प्रधानमन्त्री र अर्थमन्त्रीले कृषिमा चासो नदिएको बताएका हुन् ।

उनले भने, ‘कृषिको बजेट पनि काटेको छ । कृषिको त नकाटम् भनेर अर्थमन्त्रीसँग भन्दा उहाँले ‘के गर्नु खोइ, यस्तै हो’ भन्नुभयो । प्रधानमन्त्रीसँग कुरा गर्दा पनि खासै चासो दिनुभएन । कृषि क्षेत्रलाई कसरी अघि बढाउने भन्नेमा कसैको पनि चासो देखिँदैन ।’

उनले कृषि क्षेत्रको विकासका लागि सिँचाइको व्यवस्था र बाँझो जमिनको उपयोगलाई बढाउनुपर्ने बताए ।