काठमाडौं— प्रधानमन्त्री पुष्पकमल दाहाल प्रचण्डले आइतबार संघीय संसदको प्रतिनिधि सभामा छलफलका लागि सरकारको वार्षिक नीति तथा कार्यक्रम पेश गर्ने भएका छन् ।
आइतबार बिहान ११ बजे संसद् भवन नयाँ बानेश्वरमा बस्ने प्रतिनिधि सभा बैठकमा सरकारले शुक्रबार ल्याएको नीति तथा कार्यक्रममाथि छलफल गर्नका लागि ‘आर्थिक वर्ष २०८०/०८१ को नेपाल सरकारको नीति तथा कार्यक्रममाथिको छलफल प्रारम्भ गरियोस्’ भन्ने प्रस्ताव प्रधानमन्त्रीले सदनमा पेश गर्ने प्रधानमन्त्रीको सचिवालयले जानकारी दिएको छ ।
उनले सदनमा उक्त प्रस्ताव पेश गरेसँगै नीति तथा कार्यक्रममाथि क्रमागत रुपमा छलफल सुरु हुनेछ । आइतबार नै सरकारको नीति तथा कार्यक्रममाथि प्रमुख प्रतिपक्षी दल नेकपा एमालेका अध्यक्ष केपी शर्मा ओलीले छलफलमा सहभागी भई पार्टीका तर्फबाट धारणा राख्ने बताइएको छ ।
सरकारको नीति तथा कार्यक्रम अस्वीकार्य रहेको भन्दै कडा टिप्पणी गरेका उनले उक्त नीति तथा कार्यक्रमलाई पारित गर्न समर्थन नगर्ने बताइसकेका छन् ।
