काठमाडौं— राष्ट्रिय स्वतन्त्र पार्टीका उपसभापति डोलप्रसाद अर्यालले सदनको खालीकुर्सी हेर्दा रोष्ट्रममा आएर बोल्नु रोष्ट्रमकै अपमान गरेको जस्तो लागेको टिप्पणी गरेका छन् ।
सोमबार प्रतिनिधि सभाको बैठकमा सरकारको नीति तथा कार्यक्रममाथिको छलफलमा भाग लिँदै उनले भने ‘नीति तथा कार्यक्रममाथि आफ्नो धारणा राख्नउपस्थित भएको छु । तर, सदनको खाली कुर्सी हेर्दा आफू पनि रोष्ट्रममा आएर बोल्नु रोष्ट्रमकै अपमान गरेको जस्तो लाग्छ कहिलेकाहीँ । घरमै बसेर ऐनामा हेरेर पेन्ड्राइभमा रेकर्ड गरेर सचिवालयमा बुझाइदिए हुने हो कि भन्नेजस्तो लाग्छ । २७५ जनाबीच हुने र सुन्ने र सुनाउने नीति तथा कार्यक्रमको छलफल रेकर्डको लागिमात्रै बोलिरहेको जस्तो लाग्छ । हलको उपस्थितिलाई हेर्दा यस्तो नहुने बनाउ ।’
त्यस्तै, उनले सरकारले प्रस्तुत गरेको नीति तथा कार्यक्रम पुनर्लेखन नै गर्नुपर्ने अवस्थाको नभएको पनि बताएका छन् ।
नीति तथा कार्यक्रम कामै नलाग्ने, खारेजै गर्नुपर्छ भन्नु उपयुक्त नहुने उनको भनाइ छ ।
‘नीति तथा कार्यक्रमको बारेमा केही साथीहरूले पुनर्लेखन नै गर्नुपर्छ भन्ने कुराहरू आयो, पारित गर्न हुन्न भन्ने कुरा आयो । तर, पूरै कामै नलाग्ने खारेजै गर्नुपर्ने भन्नु अतिशयोक्ति हुन्छ भन्ने मलाई लाग्छ ।’
